काठमाडौं । सीमा नाका हुँदै भारत लैजाँदै गरेका १९ जना बालकको उद्धार गरिएको छ । रूपन्देहीको सीमा क्षेत्र सुनौली–बेलहिया नाकाबाट सिन्धुपाल्चोक घर भएकाहरुसहित १९ जना नेपाली बालकहरूको उद्धार भएको हो ।
नाबालकलाई महिला तथा बालबालिका बेचबिखन तथा ओसारपसार विरूद्ध भारतमा क्रियाशिल संस्था ‘किन इन्डिया’ र भारतीय सुरक्षा निकाय एसएसबीको पहलमा उद्धार गरिएको प्रहरीले जनाएको छ । उनीहरुलाई भैरहवा नाकासम्म बसमा लगिएको थियो । प्रहरीले ती बालकहरूलाई नेपाल–भारत बीचको दशगजा सीमा नाकाबाट उद्धार गरिएको जनाएको छ।
भारतको कर्नाटकस्थित विभिन्न बौद्ध गुम्बामा अध्ययन गराउने भनेर अभिभावक बिना बालकहरुलाई लगिएको पाइएको थियो । अध्ययनका लागि बालबालिकालाई विदेश लैजान पुरा गर्नुपर्ने प्रक्रिया पुरा नगरी अभिभावक र आवश्यक कागजात बिना लगिएका बालकहरू जोखिममा पर्ने सम्भावना देखेर उद्धार गरिएको प्रहरीले जनाएको छ।
