काठमाडौं । ‘भाउजू सुतेको बेला सिरानीले मुख च्यापेर हत्या गरे, कानमा लगाएको गहना निकाले र शव बाहिर लगेर नालीमा फालिदिएँ ।’ कैलालीको गौरीगंगा नगरपालिका–७ कैलाशपुरका नवीन नाथले प्रहरीसामू यस्तो बयान दिए । अनि प्रहरीले १९ वर्षीय सुत्केरी तुलसी नाथको आफ्नै देवरले हत्या गरेको निष्कर्ष निकालेको छ ।
कैलाशपुरमा शुक्रवार बिहान १९ वर्षीय सुत्केरी तुलसी नाथ मृत भेटिएकी थिइन् ।
विगतदेखिको सामान्य विवाद र सुनका गहनाका कारण आफूले भाउजूको हत्या गरेको पक्राउ परेका नवीन नाथले प्रहरीलाई बयान दिएका छन् ।
इलाका प्रहरी कार्यालय मालाखेतीका प्रमुख प्रहरी नायब उपरीक्षक(डिएसपी) रणबहादुर चन्दले पनि सहोदर देवरले तुलसी नाथको हत्या गरेको अनुसन्धानबाट खुलेको बताए ।
‘शवको पोस्टमार्टम हुन बाकी छ । तर, घटनाको प्रकृति र पक्राउ परेका युवकको बयानका आधारमा उनैले हत्या गरेको प्रारम्भिक ठहर छ ’ उनले भने ।
नवीनले सुनका गहनाका लागि आफूले हत्या गरेको स्वीकार गरिसकेको उनले बताए ।
भाउजूको हत्यापछि कानमा लगाएका सुनका गहना निकालेर घर नजिकै ढुङ्गामुनि लुकाएको भन्दै आफ्नो बुवालाई दिएको सूचनाको आधारमा प्रहरीले घटनामा उनको संलग्नता भएको पुष्टि गरेको थियो ।
सामान्य विवाद र सुन मोहले हत्या भएको प्रहरीको निष्कर्ष रहेको छ ।
