काठमाडौं । नेपाल प्रिमियर लिग (एनपिएल) मा सुदूरपश्चिम रोयल्सले विराटनगर किंग्ससामू १८३ रनको लक्ष्य प्रस्तुत गरेको छ ।
कीर्तिपुरस्थित त्रिवि क्रिकेट मैदानमा टस हारेर ब्याटिङको निम्तो पाएको सुदूरपश्चिमले निर्धारित २० ओभरमा सात विकेट गुमाउँदै १८२ रनको योगफल तयार पार्यो । सुदूरपश्चिमका लागि दीपेन्द्रले २४ बलमा पाँच छक्का र तीन चौकाको मद्दतले अविजित ५७ रन बनाए ।
विराटनगरका लागि अनिल खरेलले तीन थता क्रिस सोले, इस्मत अलाम र बसिर अहमदले समान एक विकेट लिए । दोस्रो ओभरको अन्तिम बलमा इस्मत आलमले ओपनर अमित श्रेष्ठलाई व्यक्तिगत एक रनमा मार्टिन गप्टिलबाट क्याच गराए ।
पाँचौं ओभरको चौथो बलमा अनिल खरेलले विराटनगरलाई दोस्रो सफलता दिलाए । २० बलमा चार चौकाको मद्दतले २३ रन बनाएर खेलिरहेका विनोद भण्डारी प्रतिश जिसीबाट क्याच हुँदै पेभेलियन फर्किए ।
छैटौं ओभरको चौथो बलमा बसिर अहमदले आरिफ शेखलाई व्यक्तिगत ९ रनमा निकोलस किर्टनबाट क्याच गराए ।
अनिलले ११ औं ओभरको तेस्रो बलमा सेफ जैबलाई बोल्ड गरे । उनी १५ बलमा एक छक्काको मद्दतले १४ रन बनाउँदै पेभेलियन फर्किए ।
अनिलले १३ औं ओभरको चौथो बलमा व्यक्तिगत तेस्रो विकेट लिए । उनले २६ बलमा समान दुई चौका र छक्काको मद्दतले ३६ रन बनाएर खेलिरहेका ब्रेन्डन म्याकमुलनलाई प्रतिशबाट क्याच गराउँदै पेभेलियनको बाटो देखाए । इशान पाण्डे १६औं ओभरको चौथौ बलमा तीन रन लिने धुनमा रनआउटको शिकार बने । उनले १६ बलको सामना गर्दै दुई चौका र एक छक्काको मद्दतले २१ रन बनाए ।
क्रिस सोलेले १९औं ओभरको तेस्रो स्कट कुग्गेलिजनलाई व्यक्तिगत १० रनमा किर्टनबाट क्याच गराए । उनले ६ बलमा दुई चौका प्रहार गरे ।
