पेनाल्टीमा चुक्दा एसियन कप, विश्वकप अनि ओलम्पिक गुमायो नेपालले

पेनाल्टीमा चुक्दा एसियन कप, विश्वकप अनि ओलम्पिक गुमायो नेपालले

फरक पत्रिका

आइतबार, असार २२ २०८२

पेनाल्टीमा चुक्दा एसियन कप, विश्वकप अनि ओलम्पिक गुमायो नेपालले

काठमाडौं । इतिहास रच्ने मौका । एउटा ठूलो अवसर । प्रतिष्ठाको लडाईं । ठूला प्रतियोगिता खेल्ने सपना । एसियन कप, विश्वकप अनि ओलम्पिक ।

एउटै खेलबाट सबै गुमायो नेपालले ।

फेरि निराश बने महिला फुटबलका नेपाली समर्थक । महत्वपूर्ण तथा निर्णायक खेलमा जित नजिक पुगेर पनि नेपालले सफलता हात पार्न सकेन ।

एसियन कप छनोटमा उज्वेकिस्तानसँग पेनाल्टी सुटआउटमा पराजित भएसँगै नेपालले धेरै अवसर गुमाएको हो ।

निर्धारित समयमा दुई गोलले पछि परेको नेपालले कप्तान सावित्राको प्रेरणादायी प्रदर्शनमा निर्धारित ९० मिनेटको खेल ३–३ को बराबरीमा पु¥याएको थियो ।

खेल बराबरी भएपछि अंक र गोल अन्तर सबै बराबरी हुने हुँदा समूह विजेताको टुङ्गो पेनाल्टीसुटआउटमा लगाइएको हो । जसमा कप्तान सावित्रा नै चुक्दा नेपालले अवसर गुमायो । उज्बेकिस्तानका चारै खेलाडीले पेनाल्टीमा गोल गरे ।

नेपालका लागि पहिलो पेनाल्टी नै सावित्राले गुमाएपछि गीता राना र सविता राना मगरले गोल गरिन् । तर चौथो पेनाल्टी गोलकिपर अन्जना राना मगरले मिस गरेपछि नेपाल पेनाल्टीसुटआउटमा ४–२ ले पराजित भयो ।

यो हार नेपालका लागि एउटा खेलमा मात्र हार थिएन । लगातार दोस्रो पटक महिला एसियन कप छनोट खेलेको नेपाल लगातार दुवै पटक एसियन कपमा पुग्न सकेन ।

यसको अर्थ नेपालले महिला एसिया कप मात्र गुमाएन, फिफा महिला विश्वकप २०२७ र लस एन्जलस ओलम्पिक २०२८ को पनि ढोका बन्द भएको छ ।

महिला एसियन कप र विश्वकप र ओलम्पिकको पनि छनोटको आधार भएकोले एसियन कपमै छनोट नहुँदा नेपालले एकै पटक तीन मुख्य प्रतियोगिताको अवसर गुमाएको हो ।

जित्नैपर्ने खेलमा नेपालले नतिजा आफ्नो पक्षमा पार्न नसक्दा नेपाली महिला फुटबल तत्कालका लागि पछाडि धकेलिने पक्का छ ।

प्रतिक्रिया
सम्बन्धित समाचार

© 2026 All right reserved to Simali Media Pvt. Ltd.  |सर्वाधिकार सिमली मिडिया प्रा.लि.मा निहित