काठमाडौँ- सार्वजनिक स्थानमा २५ जना भन्दा बढी मानिस भेला हुन नपाउने गरी कोभिड-१९ व्यवस्थापन समन्वय केन्द्र सिसीएमसीले निर्णय गरेको छ । पछिल्लो समय मुलुकमा दिनप्रतिदिन कोभिड-१९ को संक्रमण बढ्न थालेपछि सिसिएमसीले यस्तो निर्णय गरेको हो ।
सार्वजनिक स्थानमा प्रवेश गर्नुपरेमा कोभिडविरद्धको खोप लगाएको कार्ड देखाउनु पर्ने छ । सार्वजनिक स्थानमा कडाइ सभा, सम्मेलनलाई प्रतिबन्ध लगाउन सिसिएमसीले निर्देशन दिएको सिसिएमसीले जनाएको छ ।
समन्वय केन्द्रकी प्रवक्ता एवम् सहसचिव सुनिता नेपालकाअनुसार कोभिडको बढ्दो दरलाई ख्याल गर्दै जाडो बिदालाई माघ १५ सम्म लैजाने गरी निर्णय भएको छ ।केन्द्रले विद्यालय बन्द गर्नका लागि जिल्ला प्रशासन कार्यलय, स्थानीय तह र प्रदेश सरकरालाई परिपत्र गर्ने भएको छ । बढी संक्रमित भएको क्षेत्रमा कोभिड नियन्त्रण गर्न कडाइ गर्ने उनले जानकारी दिइन् ।
स्मार्ट लकडाउनको कार्यविधि लागू गर्न जिल्ला प्रशासन कार्यालयलाई निर्देशन दिएको प्रवक्ता नेपालले बताइन् । ३ गतेबाट सार्वजनिक स्थानमा प्रवेश नपाउने गरी कार्यान्वयन हुने उनले जानकारी दिइन् ।
त्यसैगरी सार्वजनिक स्थानमा एन्टीजेन्ट परीक्षण गर्न स्वास्थ्य मन्त्रालयलाई निर्देशन दिएको छ । होल्डिङ सेन्टरलाई चालु अवस्थामा राख्न निर्देशन दिएको र बजेट व्यवस्थापन गर्न मन्त्रालययलाई अनुरोध गरिएको छ । त्यसको सम्पूर्ण व्यवस्था मिलाउन जिल्ला प्रशासन कार्यालयलाई दिएको छ ।
भीडभाडलाई कम गर्ने गरी हवाई उडान तालिका परिवर्तन गर्न सरोकारवाला अनुरोध गर्ने पनि नेपालले बताइन् । विश्विद्यालयको परीक्षा तालिका सार्वजनिक भएकाले स्थगित नहुने र स्वास्थ्य सुरक्षाको मापदण्ड अपनाएर परीक्षा गर्न अनुमति दिने उनले जानकारी दिइन् ।
