सिन्धुपाल्चोक । युवालाई सीप दिलाई आत्मनिर्भर बनाउन सिन्धुपाल्चोकको चाैतारामा बरिस्ता तालिम सुरू गरिएको छ । १५ दिनसम्म चल्ने तालिममा ४० युवायुवती सहभागी छन् ।
चाैतारा साँगाचोकगढी नगरपालिकाको सहयोगमा अरनिको कृषि तथा पशुपालन फर्मले तालिम प्रदान गरेको हो । युवालाई उत्पादन र राेजगारीको वातावरण सिर्जना गर्न तालिम गरिएको फर्मले जनाएको छ ।
तालिममा सहभागीहरूले कफिबारेसमेत जानकारी पाउनेछन् । कफीको बेर्ना तयार गर्नेदेखि विभिन्न किसिमका कफी बनाएर खानसम्म बनाउने योजनाका साथ तालिमको आयोजना गरिएको फर्मका व्यवस्थापक दीपेन्द्र घलेले जानकारी दिए । तालिमपछि सीप सिकेर आफैँ व्यवसायमा लाग्न सक्ने बनाउने उद्देश्य रहेको उनले बताए ।
तालिमको उद्घाटन कार्यक्रममा नगरपालिकाका प्रमुख कृष्णप्रसाद सापकोटाले सहभागीहरूलाई बरिस्ता तालिमबाट आफूलाई सफल व्यवसायी बन्न शुभकामना दिए । विदेशिने मान्यता छाडेर रोजगारीको वातावरण सिर्जना गरि व्यवसायमा लाग्न उनले प्रेरित गरे ।