अहिले नेपाली कांग्रेसको १५ औं महाधिवेशनले राजनीति वृत्तमा सिंगो मुलुक तातेको छ । टोल टोलमा कांग्रेसका गफहरुले माहोल झनै बढाइरहेको अवस्था छ । सिन्धुपाल्चोक पनि देशको यो परिदृष्यबाट अछुतो छैन । यहाँ वडा, पालिकाको अधिवेशन सकेको कांग्रेस अब तत्काल क्षेत्र र प्रदेश अधिवेशनको तयारीमा जुटेको छ । यसै सिलसिलामा हालै चौतारा साँगाचोकगढी नगरपालिकाबाट नेपाली कांग्रेसको नगर सभापतिमा निर्वाचित हुनुभएका निर्मल श्रेष्ठसँग फरकपत्रिकाका लागि संघारमै आएको क्षेत्रीय अधिवेशनबारे गरिएको ५ वार्तालाप यहाँ प्रस्तुत गरिएको छ ।
प्रश्न १– क्षेत्रीय अधिवेशनलाई कांग्रेस चौतारा नगर समितिले कुन रुपमा हेरिरहेको छ ?
नेपाली कांग्रेसको आन्तरिक माहोलमा महाधिवेशन एउटा उत्सव मात्रै हैन महाउत्सव हो । यस प्रक्रियामा नेपाली कांग्रेसका क्रियाशील सदस्यदेखि केन्द्रीय तहको नेतृत्वसम्मको उत्साहजनक सहभागिता हुन्छ । नेपाली कांग्रेस चौतारा साँगाचोकगढी नगरपालिकाले अत्यन्तै सूक्ष्म तवरले हेरिरहेको छ यो क्षेत्रीय अधिवेशनलाई । हामीले यसलाई चौतारा साँगाचोकगढी नगरपालिकामा स्थानीय स्तरमा राजनीति गरिरहेका नेता कार्यकर्तालाई क्षेत्रीय एवं केन्द्रीय स्तरसम्म पुर्याउने सुनौलो अवसरका रुपमा लिएको छौं ।
प्रश्न २–नगरका सबै वडाबाट प्रतिनिधित्व गराउन कस्तो तयारी गर्नुभएको छ ?
नेपाली कांग्रेसमा धेरै पुराना अनुभवीदेखि भर्खरै राजनीतिमा चासो राख्न थाल्नुभएका युवा साथीहरू सम्म हुनुहुन्छ । जहाँसम्म नगरका सबै वडाबाट प्रतिनिधित्व गराउने कुरा छ त्यसका लागि हामिले पहिलो कुरा त पार्टी भित्र उहाँहरुको क्रियाशिलता र योगदानलाई मुख्य आधार बनाइएको छ । पार्टीले विभिन्न क्लस्टर छुट्टयाएको छ त्यसैको आधारमा हामीले सवै वर्गको समान सहभागिताका लागि पार्टीको उपल्लो नेतृत्वसंग निरन्तर छलफल एवं संवाद गरिरहेका छौं । यस अगाडिको अधिवेशनहरुमा हामी चौतारा साँगाचोकगढी नगरपालिकाका क्षेत्रीय प्रतिनिधिहरुको समन्वय हुन नसक्दा हामीले केन्द्रीय महाधिवेशन प्रतिनिधि एक जनालाई पनि जिताउन सकेनौ। अहिले म निर्वाचित भएपछि सबै वडा सभापतिज्यूहरु सहित क्षेत्रीय प्रतिनिधिज्यूहरुसँग अनौपचारिक छलफल गरेर एकताबद्द बनाउने यत्न गरिरहेको छु ।
प्रश्न ३– क्षेत्रीय अधिवेशनमा नगरको मुख्य एजेन्डा के हुनेछ ?
क्षेत्रीय अधिवेशनमा नगरको मुख्य एजेन्डा त हाम्रो नगर भित्रका आदरणीय नेता ज्युहरु उम्मेदवार रहनुभएको स्थानमा विजयी गराउनु हुनेछ । अर्को प्रमुख एजेन्डा निकट भविस्यमा हुने स्थानीय तहको निर्वाचनमा पार्टीको उम्मेदवार हरुलाई कसरी जिताउन सकिन्छ त्यस विषयमा पनि गम्भीर छलफल गरिने छ ।
प्रश्न ४–क्षेत्रीय नेतृत्वमा नगरको भूमिका र अपेक्षा के छ ?
नेपाली कांग्रेसको महाधिवेशनमा नेतृत्व चयनको प्रक्रिया लोकतान्त्रिक प्रक्रियामार्फत हुनेछ । क्षेत्रीय नेतृत्वमा नगरको तर्फबाट विभिन्न पदहरुमा दावी रहन्छ । त्यसका लागि अन्य पालिकाको समेत साथ सहयोग रहन्छ भन्ने अपेक्षा छ ।
प्रश्न ५–क्षेत्रीय अधिवेशनलाई गुटगत प्रतिष्पर्धाभन्दा संगठन सुदृढीकरणतर्फ लैजान के गर्नुपर्ला ?
यसपटकको क्षेत्रीय अधिवेशन अलि पृथक ढंगबाट हुँदैछ । यो पालि गुटगतभन्दा व्यक्तिगत प्रतिष्पर्धा हुने विश्वास छ । जहाँसम्म संगठन सुदृढीकरणको कुरा छ त्यसका लागि लोकतान्त्रिक प्रक्रियामा सहभागी हुन पाउने अधिकार नेपाली कांग्रेस पार्टीले सबै क्षेत्रीय प्रतिनिधिहरुलाई दिएको छ । समावेशी र समानुपातिक प्रतिनिधित्व सबै वर्ग र जातजातिको हुनुपर्छ । युवाहरुलाई पार्टी तर्फ आकर्षित गर्नका लागि पार्टीभित्र धेरैभन्दा धेरै युवा प्रतिनिधित्वको आवश्यकता छ । भाषा, धर्म, जातजाति एंव युवा वर्गको समान सहभागितासहित पहुँच हुने हो भने नेपाली कांग्रेसको संगठन आफैं मजबुत भइहाल्छ ।
