सिन्धुपाल्चोक । फागुन २१ मा हुने प्रतिनिधिसभा सदस्य निर्वाचन नजिकिँदै गर्दा सिन्धुपाल्चोक क्षेत्र नं. १ मा चुनावी अभियान तीव्र बनेको छ । तीन स्वतन्त्रसहित १८ उम्मेदवार रहेको यहाँ प्रमुख चार दलबीच प्रतिष्पर्धा हुने आकलन गरिएको छ ।
नेपाली कांग्रेसबाट जंगबहादुर लामा, नेकपा एमालेबाट सरेश नेपाल, नेपाली कम्युनिष्ट पार्टीबाट माधव सापकोटा र राष्टिय स्वतन्त्र पार्टीबाट भरत पराजुलीबीच चारपक्षीय प्रतिष्पर्धा हुने आकलन गरिएको हो । यहाँ कांग्रेसको संगठन बलियो छ । त्यसपछि एमाले अनि नेपाली कम्युनिष्ट पार्टीको संगठन रहेको छ । तर, रास्वपाका उम्मेदवार पराजुलीको आक्रामक चुनावी अभियानले चारपक्षीय भिडन्त हुने आकलन गरिएको हो ।
कांग्रेसका जंग अहिले यहाँ नयाँ अनुहार हुन् । यसअघि कांग्रेसबाट मोहनबहादुर बस्नेत उम्मेदवार हुने गरेका थिए । त्यस्तै नेकपाका माधव निवर्तमान सांसद हुन् । उता एमालेका सरेश नेपाल यसपटक जितको खोजीमा छन् । यहाँ पछिल्लो ३१ वर्षदेखि एमालेले जित्न सकेको छैन । त्यसैले यसपटक एमाले जितको खोजीमा रहेको हो ।
यो क्षेत्रमा एमालेबाट अमृतकुमार बोहोरा ९२०४८, २०५१०, कांग्रेसबाट मोहन बस्नेत ९२०५६, २०७००, माओवादीबाट अग्नि सापकोटा ९२०६४, २०७०, २०७४० र माधव सापकोटा ९२०७९० निर्वाचित भएका थिए।
विगतका चुनावी नतिजा हेर्दा यो क्षेत्रमा कांग्रेस, एमाले र माओवादीले नतिजा आफ्नो पक्षमा पारेका छन् । २०४८ को निर्वाचनमा एमालेका अमृतकुमार बोहोराले १३ हजार ५ सय मत ल्याएर विजयी बनेका थिए । उनका प्रतिद्वन्द्वी कांग्रेसका मोहनबहादुर बस्नेतले ११ हजार ९ सय मत प्राप्त गरेका थिए । ०५१ को निर्वाचनमा एमालेका बोहोराले १३ हजार ३ सय मत ल्याएर विजयी बने । उनले १३ हजार १ सय मत प्राप्त गरेका राप्रपाका पशुपतिशम्शेर राणालाई पराजित गरेका थिए ।
०५६ को निर्वाचनमा नेपाली कांग्रेसका मोहनबहादुर बस्नेतले बाजी मारे । ०५१ मा ७ हजार मत ल्याएको कांग्रेसले ०५६ मा १९ हजार १ सय मत प्राप्त ग¥यो । एमालेका बोहोराले १५ हजार ९ सय र राप्रपाका राणाले १० हजार मत ल्याए । ०५१ को तुलनामा कांग्रेसले १२ हजार र एमालेले तीन हजार मत थप्यो ।
०६४ को संविधानसभा निर्वाचनमा तत्कालीन एमाओवादीका राजकुमार श्रेष्ठ २१ हजार ३ सय मतसहित विजयी बने । एमालेले १३ हजार १ सय मत ल्याएर निकटतम प्रतिद्वन्द्वीमै चित्त बुझायो भने कांग्रेसले ७ हजार ५ सय मत ल्यायो ।
अघिल्लोको तुलनामा संविधानसभा निर्वाचनमा कांग्रेसले १२ हजार र एमाले तीन हजार मत घटायो । २०७० मा यो क्षेत्रबाट कांग्रेसले १५ हजार २१ मत ल्याएको थियो । त्यस्तै एमालेले १४ हजार नौ सय ८९, माओवादीले १० हजार तीन सय ३० र राप्रपाले ५ हजार पाँच सय ६७ मत ल्यायो । ६४ को तुलनामा यो क्षेत्रमा कांग्रेसले एक सयभन्दा बढी प्रतिशत मत बढाएको देखिन्छ ।
पछिल्लो २०७९ को स्थानीय निर्वाचनको परिणाम हेर्दा कांग्रेसको पकड देखिन्छ । सिन्धुपाल्चोकको १२ स्थानीय तहमध्ये क्षेत्र नं १ मा रहेका ७ मध्ये कांग्रेस एक्लैले बाह्रबिसे, भोटेकोशी र त्रिपुरासुन्दरीमा प्रमुख÷उपप्रमुख जितेको छ । सुनकोशी र बलेफीमा उपप्रमुखसहित बहुमत वडाध्यक्ष जितेको छ । जुगलमा भने माओवादीसँगको सहकार्यमा उपाध्यक्ष जितेको छ । पहिले तीन वटा क्षेत्र हुँदा साविक क्षेत्र नं. २ बाट अहिले क्षेत्र नं. १ गाभिएका स्थानमा कमजोर भनिएको कांग्रेसले जितेको छ । कमजोर रहेको भनिएको चौतारा साँगाचोकगढी नगरपालिकामा समेत दुई वडामा कांग्रेसले जित हासिल गरेको छ ।
हालको क्षेत्र नम्बर १ को ५४ वटा वडा छन् । तीमध्ये कांग्रेसले मात्रै ३२ वटा वडा जितेको छ । एमाले १६ वटा वडामा विजयी हुँदा माओवादी केन्द्रले ५ वटा मात्रै जितेको छ । वडाध्यक्षले पाएको मत हेर्दा कांग्रेसको ३४ हजार ७६१, एमालेको २७ हजार ८०३ र माओवादी केन्द्रको १८ हजार ८५२ मत छ । त्यस्तै राप्रपाको २ हजार र नेकपा एकीकृत समाजवादीको १६५० मत छ । यो तथ्यांकले कांग्रेस अगाडि रहेको पुष्टि गर्छ ।
साविकको क्षेत्र नं. १ मा अहिले साविकको क्षेत्र नं. २ का केही गाउँ थपिएको छ । यो क्षेत्रमा चौतारा साँगाचोकगढी नगरपालिकाका वडा नं. २, ३, ४, ९ र १० वडा थपिएका छन् । यो सँगै जुगल गाउँपालिका र बलेफी गाउँपालिकाको वडा नं. १, २ र ३ नं. वडा पनि अहिलेको प्रतिनिधि सभा १ मा गाँसिएको छ । साविकको क्षेत्र नं. २ बाट थोरै गाउँ गाभिएकाले साविक क्षेत्र नं. १ कै मतलाई आधार मान्दा र विगत पल्टाउँदा मतदाता अस्थिर भने देखिन्छन् ।