हेलम्बु । सिन्धुपाल्चोकको हेलम्बु गाउँपालिकाले नीति तथा कार्यक्रम सार्वजनिक गरेको छ । आर्थिक वर्ष २०८२,८३ को लागि नमूना गाउँपालिका निर्माण भन्ने संकल्पसहित बृहत्तर नीति तथा कार्यक्रम सार्वजनिक गरेको हो । गाउँसभाको बैठकमा हेलम्बु गाउँपालिका १ का वडाअध्यक्ष एवंम आर्थिक बिकास समितिका संयोजक दावा ग्याल्जेन लामाले नीति तथा कार्यक्रम प्रस्तुत गरे ।
नीति तथा कार्यक्रममा नागरिकलाई उपचार खर्चदेखि काठमाडौं लगिएको मेलम्ची पानीको हिस्सा माग्ने नीतिशरु छन् । गाउँपालिकाले हरेक नागरिकलाई गम्भीर रोगको अवस्था आउँदा “लागत साझेदार प्रणाली” अन्तर्गत ५ लाखसम्मको उपचार खर्च सहयोग गर्ने योजना ल्याएको छ। यो कार्यान्वयनका लागि १ करोड ५० लाख रुपैयाँ विनियोजन गरिएको छ।
कार्यालयदेखि विद्यालयसम्म डिजिटल सेवा विस्तार गरिने, घर नम्बर, जनसंख्या, योजना लगायतको डेटा एकीकृत डिजिटल प्रणालीमा सुरक्षित राखिने नीतिलाई गाउँपालिकाले अगाडि ल्याएको छ । कक्षा ८ देखि १२ सम्म सबै कक्षामा स्मार्ट बोर्ड र अन्य डिजिटल सामग्रीहरू उपलब्ध गराइनेछ।
दिर्घरोगीका लागि निःशुल्क औषधि र एम्बुलेन्स सेवा, जनप्रतिनिधि, कर्मचारी, शिक्षक सबैलाई समेट्दै ६ लाख बराबरको स्वास्थ्य बीमाको योजना ल्याइएको छ।
काठमाडौं उपत्यकामा लैजाने पानीको मूल्यमा २५ प्रतिशत हिस्सा हेलम्बु गाउँपालिकालाई उपलब्ध गराउन सरकारलाई दवाब दिइने नीतिसमेत गाउँपालिकाले अघि सारेको छ ।
२ करोड ५० लाख बजेटसहित नमूना कृषि फार्मः च्याउ, आलु, फलफूल र पशुपालनको आधुनिक प्रविधिसहित आत्मनिर्भर कृषि प्रणाली विकास गरिनेछ। तल्लो भेगमा रु २६० र माथिल्लो भेगमा रु ३१० को दरले मल अनुदानमा उपलब्ध गराइनेछ।
हेलम्बु बोद्धिसत्व मोडल स्कुललाई शैक्षिक स्रोत केन्द्रको रूपमा विकास गरिने छ। कम्प्युटर, सिभिल र इलेक्ट्रिकल इञ्जिनियरिङ्ग अध्ययन हुने वातावरण तयार पारिनेछ।
पाँच वटा आवासीय सुविधा सहितका नमूना विद्यालय स्थापनाको तयारी गरिएको जनाउँदै विपन्न र जेहेन्दार विद्यार्थीलाई विदेशमा एमबिबिएस पढ्न छात्रवृत्रि दिइने योजना पनि समावेश गरिएको छ ।
हिमाल क्षेत्रको संवेदनशीलता हेरेर जलवायु असर न्यूनीकरण, पुनर्निर्माण र अनुकुलनमा काम गरिनेछ। छ्यादी यो गाङ (४६०० मि.उचाइ) मा अन्तरक्रियात्मक सम्मेलन आयोजना गरिनेछ।
हेलम्बु हिमालयन ग्रेटट्रेलमा निर्माणाधीन पदमार्गलाई तीव्रता दिइनेछ। सम्भोटा भाषा र संस्कृत भाषाको संरक्षणः शिक्षण संस्थामा यी भाषालाई प्राथमिकता दिइने र शिक्षकलाई प्रोत्साहनस्वरूप २० हजार मासिक पारिश्रमिक दिइनेछ।
गर्भवती महिलालाई १० हजार सहायता गरिने तर यदि मद्यपान तथा धूमपान नगरेको प्रमाणित भएमा मात्रै सहायता गरिने गाउँपालिकाले जनाएको छ ।
प्लास्टिक बहिष्कार गरि कार्यालयहरूमा तामाका भाँडाको अनिवार्य प्रयोग गरिने जनाइएको छ ।
