काठमाडौँ । सस्तोमा अमेरिकी डलर सट्टा गर्ने भन्दै डलर देखाई ठगी गर्ने एक व्यक्तिलाई प्रहरीले पक्राउ गरेको छ । पक्राउ पर्नेमा सिन्धुपाल्चोक बाह्रबिसे नपा ३ घर भएका ताराबहादुर तामाङ रहेका छन् ।

उनलाई काठमाडौँ उपत्यका अपराध अनुसन्धान कार्यालयको टोलीले भक्तपुर चाँगुनारायण नपा ३ दुवाकोटबाट पक्राउ गरेको हो ।

ताराले नवलपरासी (बर्दघाट सुस्ता पूर्व) गैँडाकोट नपा ३ ढोडेनी स्थित विभिन्न व्यक्तिहरूलाई फोन सम्पर्क गरी सस्तो दरमा अमेरिकन डलर सट्टा गर्ने भनी ठगी गरेको प्रहरीले जनाएको छ । प्रहरीका अनुसार उनले डलरको आकारमा काटिएको कागजको बिटो रुमालमा पोको पारेर दिई नेपाली तीस लाख रुपियाँ ठगी गरेका थिए ।

आरोपी तामाङ माथि थप अनुसन्धान एवं आवश्यक कारबाहीका लागि जिल्ला प्रहरी कार्यालय नवलपरासी (पूर्व) पठाइएको छ ।