सिन्धुपाल्चोकमा पनि ‘लम्पी–स्किन’को खतरा, लगाइयो पशुचौपायालाई खोप

सिन्धुपाल्चोकमा पनि ‘लम्पी–स्किन’को खतरा, लगाइयो पशुचौपायालाई खोप

फरक पत्रिका

मंगलबार, भाद्र १७ २०८२

सिन्धुपाल्चोकमा पनि ‘लम्पी–स्किन’को खतरा, लगाइयो पशुचौपायालाई खोप

सिन्धुपाल्चोक। सिन्धुपाल्चोकका पशुचौपायामाथि ‘लम्पी–स्किन’ रोग संक्रमणको खतरा बढेको छ । छिमेकी जिल्ला काभ्रेमा यो रोग देखिएसँगै सिन्धुपाल्चोकमा पनि यसको खतरा बढेको हो ।

काभ्रेको बनेपाका केही वडामा ‘लम्पी–स्किन’को सङ्क्रमण देखिएको छ । पशु सेवा कार्यालय काभ्रेपलाञ्चोककाअनुसार बनेपाका वडा नं १२ र १४ का केही दुधालु पशुमा देखिएको सङ्क्रमण पुष्टि हो । रोगको संक्रमण देखिएसँगै कार्यालयले खोप अभियानलाई तीव्रता दिएको जनाएको छ ।

जिल्लाको धुलिखेल, पाँचखाल तथा मण्डनदेउपुरमा समेत सङ्क्रमण देखिएको र परीक्षणका लागि प्रयोगशाला पठाउन नमूना संकलन भइरहेको जनाइएको छ । छ महिनादेखि काभ्रेपलाञ्चोक र सिन्धुपाल्चोक दुई जिल्लाका २५ स्थानीय तहका पशुमा लम्पी–स्किनविरुद्धको खोप लगाइएको छ भने भदौ पहिलो हप्ता सप्ताहब्यापी चेतनामुलक कार्यक्रम सम्पन्न गरिएको छ ।
पशु सेवा कार्यालयका अनुसार गत वर्ष काभ्रेपलाञ्चोकमा लम्पी–स्किन सङ्क्रमित २८ हजार ६५६ पशुमध्ये एक हजार २७४ पशु मरेका थिए । जिल्लाको १३ स्थानीय तहमध्ये केही तहले पशु मरेका किसानलाई राहत प्रदान गरेका थिए ।

यो रोगको सङ्क्रमण भएको लैनो गाईभैँसीमा दूध दिने क्षमता ७० प्रतिशतसम्म घट्ने गर्दछ । गाईभैँसीमा यो रोग देखापरेमा ज्वरो आउने, झोक्राउने, दानापानी कम खाने, दूध उत्पादन घट्ने, छालामा एकदेखि पाँच सेन्टिमिटरको कडा गोलो गिर्खा देखिने, ओठ, मुख र नाकभित्र घाउ देखिने, आँखा र नाकबाट अत्याधिक मात्रामा तरल पदार्थ आउने,र्याल काढ्ने, लिम्फनोड सुनिने लक्षण देखा पर्ने र अन्त्यमा मृत्यु हुने हुन्छ ।

यस्तै लम्पी स्किन रोग लगाउने भाइरस गोठको वातावरणमा लामो समयसम्म जीवित रहन्छ । यो रोग लागेर मरेका पशुको उचित तरिकाले गाड्ने वा जलाउने कार्य छिटोभन्दा छिटो गर्नुपर्दछ । लामखुट्टे, किर्ना र भुसुनाजस्ता कीराले यो रोगको जिवाणु रोगी पशुबाट स्वस्थ पशुमा सर्ने गर्छन् ।

वर्षात्को मौसममा बढी देखिने यो रोग रोगी पशुको सिङ्गान, दूध र घाउबाट निस्केको पीप, रगतजस्ता जैविक रसको प्रत्यक्ष संसर्गबाट सर्नसक्छ । सङ्क्रमित गाईबस्तुको ओसारपसारबाट, सामुदायिक चरन क्षेत्र तथा दाना एवं पानी खाने ठाउँबाट, प्राकृतिक वा कृत्रिम गर्भाधानबाट पनि यो रोग सर्ने गरेको पाइएको छ ।

प्रतिक्रिया
सम्बन्धित समाचार

© 2026 All right reserved to Simali Media Pvt. Ltd.  |सर्वाधिकार सिमली मिडिया प्रा.लि.मा निहित