सिन्धुपाल्चोक । मेलम्ची नगरपालिका ११ मेलम्चीस्थित इन्द्रावती खोलामा पौडी खेल्ने क्रममा बेपत्ता अन्जिता ज्योतिको पनि शव फेला परेको छ ।पाँचपोखरी थाङपाल गाउँपालिका ६सियालेकी ज्योतिको बेलिबृजबाट एक सय मिटर तल मेलम्चीमा शव फेला परेको हो ।
खोलाले बगाएको दुईमध्ये अर्की एक किशोरीको हिजै शव फेला परेको थियो। सँगै नुहाउन गएको मेलम्चीकी १८ वर्षीया निर्जला गिरीको हिजो शव फेला परेको हो ।
सिन्धुपाल्चोकको मेलम्ची गाउँपालिका–११ स्थित इन्द्रावती खोलाले सोमबार नुहाउने क्रममा दुई किशोरीलाई बगाएको थियो ।
प्रहरीकाअनुसार मेलम्ची ९ कि १८ वर्षीया निर्जला गिरी मृत अवस्थामा फेला परेकी हुन् भने अर्की किशोरी पाँचपोखरी थाङपाल गाउँपालिका–६ की १४ वर्षीया अन्जिता ग्योतिको शव आज भेटिएको हो ।
निर्जला मामाको छोरी हुन् भने अन्जिता फूपूको छोरी हुन्। निर्जला सानैदेखि आफ्नो फूपूसँगै बस्दै आएकी थिइन्। उनी ३ वर्षको हुँदा आमाको मृत्यु भएको थियो भने केही वर्षपछि बावु पनि बेपत्ता भए । अभिभावकविहीन भएपछि निर्जलालाई फूपूले स्याहार्दै आएकी थिइन्।
वाग्मती प्रदेश प्रहरी कार्यालय, हेटौँडाका अनुसार खोलाले बगाएको सूचना प्राप्त हुनासाथ इलाका प्रहरी कार्यालय मेलम्चीबाट प्रहरी निरीक्षक योगेश खरेलको कमाण्डमा ७ जनाको टोली तत्काल खटिएको थियो।
खोज तथा उद्धारका क्रममा घटनास्थलबाट करिब १ किलोमिटर तल खोलाको किनारमा निर्जला गिरी मृत अवस्थामा फेला परेकी थिइन्।
काठमाडौँमा नै बसेर पढ्दै आएका उनीहरु नागरिकता बनाउनको लागि सिन्धुपाल्चोक आएका थिए। अन्जिता र निर्जला दुवैजनाको नागरिकता बनाउनका लागि अन्जिताका बुवाले गाउँ ल्याएका थिए।
बेपत्ता किशोरीको खोजीका लागि मंगलबार बिहानदेखि नेपाल प्रहरी, सशस्त्र प्रहरी बल र नेपाली सेनाको संयुक्त टोली घटनास्थलमा परिचालित भई खोज तथा उद्धार गररेको थियो ।