सिन्धुपाल्चोक । हिमाली क्षेत्रमा पालिने चाैरी लोप हुन थालेपछि सिन्धुपाल्चोकको हेलम्बु गाउँपालिकाले यसको संरक्षण अभियान चालेको छ। चाैंरीप्रति आन्तरिक तथा बाह्य पर्यटकसमेत आकर्षित हुने भएकाले गाउँपालिका यसको संरक्षणमा जुटेको हो ।
पछिल्ला समय चौरी र याकको सङ्ख्या घटिरहेकोले त्यसलाई बढाउन उक्त गाउँपालिकाले विभिन्न कार्यक्रम ल्याएको छ । चाैरी लोप हुन लागेको भन्दै ब्रिमु (याक) ल्याई माथिल्लो क्षेत्रमा प्रत्येक वर्ष छाड्न लागिएको गाउँपालिका अध्यक्ष निमाग्याल्जेन शेर्पाले जानकारी दिए ।
हेलम्बुको माथिल्लो क्षेत्र मेलम्ची घ्याङलगायतका स्थानमा चौरी, याक हेर्न पाइन्छ । तर अहिले हेर्न पनि नपाउने अवस्था आउन लागेको भन्दै चाैंरी संरक्षणमा पालिका लागिरहेको उनले बताए। हेलम्बुले यसअघि नै चाैरी संरक्षण अभियानअन्तर्गत बीमा गरेको छ ।
चाैंरीपालन गरेमा स्थानीयकाे आर्थिक हैसियत बलियो हुने, गाउँवासीले राेजगारी पाउने मात्रै नभई चाैंरीकै कारण पर्यटक बढ्ने भएकाले यस्तो अभियान ल्याईएको अध्यक्ष शेर्पा बताउँछन् ।
याकको सङ्ख्या बढाउने र चौरीको संरक्षण गरेमा पर्यटकीय नगरी हेलम्बुमा अझै आन्तरिक र बाह्य पर्यटकको आगमन हुने शेर्पाको भनाइ छ ।
हेलम्बु ह्योल्मो समुदायको बसोबास क्षेत्र हो । गुम्बा नै गुम्बाको गाउँ भनेर हेलम्बुलाई चिनिन्छ । रेडपाण्डा, हिमाल, ग्रेटटेल हेर्न यहाँ पर्यटकहरू आउने गर्दछन् । योसँगै अब हेलम्बुमा चाैंरी हेर्न जाने गन्तव्यकाे सूचीमा राख्ने गाउँपालिकाको योजना रहेको छ ।