सिन्धुपाल्चोक । नेपाल र चीनको सीमा सिन्धुपाल्चोकको तातोपानी नाकामा विदेशी पर्यटकको भीड लागेको छ । पछिल्ला केही दिनदेखि मानसारेवर जाने पर्यटक यो बाटो हुँदै आएपछि यहाँ भीड बढेको हो ।
गएको मंगलबार भोटेकोशी बाढीले रसुवागढी नाका बन्द भएको थियो । पर्यटकहरु रसुवा हुँदै मानसारेवर जान नपाएपछि तातोपानीको बाटो उनीहरुले वैकल्पिक मार्गका रुपमा पाएका हुन् ।
कैलाश मानसरोवर जाने तीर्थयात्रीलाई चीन सरकारले जाङ्मुपोर्ट (खासा) सडक खुला गरेको छ । नेपाल–चीन सरकार तीर्थयात्रीका लागि वैकल्पिक बाटोको रूपमा तातोपानी–खासा नाकालाई प्रयोग गर्न सहमत भएका हुन् ।
दैनिक पाँच सय तीर्थयात्रु र पर्यटकले अध्यागमन कार्यालय कोदारीबाट अराइभल र डिपार्चरको अनुमति लिन्छन् । बाढीले रसुवा टिमुरे केरुङ सडक सम्पर्क विच्छेद भएपछि कैलाश मानसरोवर जाने र उताबाट तातोपानी हुँदै नेपाल फर्किने पर्यटकहरुको संख्यामा एक्कासी वृद्धि भएको अध्यागमन कार्यालय कोदारीले जनाएको छ । तिब्बतको कैलाश मानसरोवर जाने र पुगेर फर्कने तीर्थयात्रीले अहिले तातोपानी नाका प्रयोग गरिरहेका हुन् ।
हिन्दु र बौद्ध धर्मको आस्थाको केन्द्रको रुपमा रहेको कैलाश मानसरोवर दर्शन गर्ने पर्यटकमा भारतीय नागरिक बढी छन् ।
तातोपानी नाका भएर आउजाउ गर्नेमा अमेरिका, क्यानडा, स्वीडेन, नेदरल्याण्ड र सिंगापुरका पर्यटकहरु पनि उल्लेख्य छन् । तर सडकको दुरावस्थाका कारण पर्यटकहरु मारमा पर्ने गरेका छन् । काठमाडौंबाट बिहानै सवार तीर्थयात्रीलाई स्वशासित क्षेत्र तिब्बतको न्यालम लगेर राख्ने गरिएको छ ।
