काठमाडौँ- तनहुँ समाज युकेले मृगौला पीडित महिलालाई आर्थिक सहयोग गरेको छ । युके समाजले तनहुँ व्यास वडा नं १० धैरेनीकी मृगौला पीडित सम्झना गुरुङलाई ५ लाख २६ हजार रुपैयाँ आर्थिक सहयोग गरेको हो ।
उनले सुमेरो हस्पिटलमा डाईलेसिस गरिरहेकी छिन् । बेलायतमा बस्दै आएका नेपालीहरुले गुरुङको उपचारमा आर्थिक अभाव भएपछि उक्त रकम संकलन गरेका हुन् ।
युके समाजको नेतृत्व गर्दै समाजका सदस्य पूर्णबिर गुरुङले उक्त रकम गुरुङको परिवारलाई हस्तान्तरण गरेका थिए । समाजका अध्यक्ष लेख गुरुङले बिपतका बेलामा आ-आफ्नो ठाँउबाट आर्थिक सहयोग गर्नेहरूलाई धन्यवाद दिए ।
‘आपत-बिपतमा मानवीयताको धर्म देखाउनुपर्छ । जटिल रोग लागेका मानिसको उपचार गर्न राज्य पनि तयार हुनुपर्छ र साथसाथै सबैभन्दा अगाडि समाज अगाडि रहनुपर्छ,’ उनले भने ।
देशभरी रहेका विपन्न परिवारलाई समाज सहयोग गर्न सदा तयार रहेको उनको भनाइ छ । समाजमा आर्थिक अभाव भएर कोही पनि बाँच्न नपरोस भनेर समाजले विभिन्न समयमा आर्थिक सहयोग गर्दै गुरुङले बताए ।
समाजले यस अघि पनि मुलुकभरक विभिन्न ठाउँमा आर्थिक सहयोग गर्दै आएको छ । तनहुँ समाज युके र कुन्छा लम्जुङ्गबाट युके आई बस्दै गरेका व्यक्तिहरूले सहयोग जुटाएका थिए । समाज युकेले विभिन्न मृगौला पीडित, क्यान्सरका बिमारी, दृष्टिविहिनहरुलाई सहयोग गरेको थियो ।
कोभिड -१९ बाट अति विपत्तमा परेका परिवारहरुलाई उद्योग वाणिज्य महासंघ तनहुँसँग सहकार्य गरि राहत वितरणसमेत गरेको थियो । त्यसैगरि समाजले तनहुँका विभिन्न विद्यालयहरुलाई कम्प्युटर लगायतका शैक्षिक सामाग्री उपलब्ध गराएको थियो ।
